Sarria anima a doar sangue este martes cunha unidade móbil na rúa da Liberdade
Sarria acollerá este martes, 15 de setembro, unha nova campaña de doazón de sangue coa instalación dunha unidade móbil na rúa da Liberdade, á altura da cafetería Don Pepe. A iniciativa "Este verán doa sangue", promovida pola Axencia de Doazón de Órganos e Sangue (ADOS), permitirá realizar doazóns de 10:00 a 14:00 horas e de 16:00 a 21:00 horas.
A campaña busca facilitar as doazóns durante o período estival e lembrar a importancia de manter as reservas de sangue, especialmente nunha época na que os desprazamentos e as vacacións poden reducir o número habitual de doadores.
As persoas que acudan a doar deberán levar a tarxeta de doador, o DNI ou un documento similar. Ademais, deberán informar o persoal médico se están a tomar algún medicamento.
Desde a organización lembran tamén que é necesario almorzar antes de realizar a doazón e, no caso de acudir despois de xantar, agardar dúas horas. Tamén recomendan non facer unha comida copiosa antes de doar.
Para máis información, a campaña pon á disposición da cidadanía o teléfono gratuíto 900 100 828.