Sarria premia os seus lectores máis fieis polo Día das Bibliotecas
A Biblioteca Pública Municipal Camilo Gonsar de Sarria celebrará o Día das Bibliotecas, que se conmemora o sábado 24 de outubro, cunha programación que inclúe a entrega de premios aos usuarios máis lectores, o recoñecemento a un colaborador da entidade e a presentación dun libro.
O acto central terá lugar este venres, a partir das 19:30 horas, nas instalacións da biblioteca. Nesta cita entregaranse os agasallos ao súper lector infantil, Fiz Regueiro Fernández, e á súper lectora adulta, Carmen Resco Vizcaíno, por seren as persoas que máis títulos levaron en préstamo durante o ano.
Tamén recibirán un obsequio os 16 usuarios adultos que completaron o reto lector proposto pola biblioteca, consistente en ler os dez libros seleccionados ao longo de dez meses. Ademais, José Manuel Valiña López será distinguido como usuario benefactor pola súa colaboración coa entidade a través das doazóns de prensa diaria.
A programación continuará ás 20:00 horas coa presentación de 'Cuando el Camino mata', obra do escritor Pepe Gómez Sandes.
A actividade cultural arredor da lectura tamén está a ter protagonismo estas semanas na biblioteca sarriá. O mércores comezou o Club de lectura de cómic, no que unha decena de participantes compartiu impresións sobre 'La casa', de Paco Roca. A próxima cita será o mércores 28, cando arranque unha nova temporada do Club de lectura de narrativa. As 20 prazas dispoñibles xa están cubertas e o grupo comezará coa novela 'Mi familia y otros animales', de Gerald Durrell.
Ambos os clubs están coordinados polo guionista e escritor Manuel Darriba. A programación completarase o xoves 29 co obradoiro de escritura creativa 'Raíces de tinta', dirixido por María Casar e previsto para as 18:00 horas.