Sonia Arias achega a poesía ao alumnado do CEIP Eduardo Cela Vila de Triacastela

SarriaXa
A escritora paradelense impartiu un obradoiro creativo centrado nas emocións, os valores e a lingua, no que os escolares tamén elaboraron un poema colectivo
Sonia Arias libro ceip Triacastela
17 Nov 2026

A escritora paradelense Sonia Arias impartiu un obradoiro de poesía no CEIP Eduardo Cela Vila de Triacastela, unha iniciativa coa que achegou a creación literaria aos máis pequenos a través dunha actividade dinámica e participativa. Ademais, o Concello adquiriu exemplares do libro 'Antes pasábase por aquí', da autora, para entregar ao alumnado do centro.

Este é o quinto colexio que visita Arias con esta proposta, unha experiencia coa que asegura estar "encantada". A autora destacou a motivación dos nenos e nenas e agradeceu o traballo do profesorado, así como as posibilidades que ofrecen os centros con poucos alumnos para desenvolver actividades máis próximas e centradas en cada escolar.

O obradoiro combinou diferentes actividades para manter a atención e fomentar a participación. A través da poesía, o alumnado traballou as emocións que se agochan detrás da creación literaria, os aspectos lingüísticos e valores como a superación persoal e dos medos. A sesión rematou coa elaboración dunha poesía colectiva.

Arias agradeceu a colaboración dos centros educativos que apostan por este tipo de iniciativas para espallar a cultura e os valores educativos. Tamén puxo en valor a creatividade dos escolares, que considera fundamental neste tipo de experiencias.

0.14868593215942