Triacastela incorpora o xogo de mesa 'Saint Jaques', inspirado no Camiño Francés
Triacastela xa conta co xogo de mesa 'Saint Jaques', unha proposta de Brinco Soluciones Integrales desenvolvida coa colaboración da Xunta de Galicia e inspirada no Camiño de Santiago, concretamente no itinerario francés, que une Saint-Jean-Pied-de-Port con Compostela. O xogo foi presentado no CEIP Eduardo Cela Vila e na Casa do Maior Xeroser-Triacastela.
O taboleiro toma como referencia o tradicional xogo da Oca e propón avanzar polo percorrido a través de diferentes preguntas de cultura xeral, que os participantes deberán responder correctamente para continuar a partida. En total, conta con 90 paradas e o obxectivo é chegar a Santiago de Compostela antes que o resto dos xogadores.
A iniciativa busca achegar o Camiño Francés dun xeito lúdico e participativo, combinando o entretemento co coñecemento da ruta xacobea e do seu patrimonio.