Claudio Garrido insiste: "O matadoiro supón unhas perdas anuais duns 200.000 euros para o Concello de Sarria"

SarriaXa
O goberno local defende manter a titularidade municipal das instalacións, pero aposta por unha xestión profesional que evite que as perdas sigan recaendo nos veciños
Concello-de-Sarria
18 Nov 2026

O goberno de Camiña Sarria, liderado polo alcalde, Claudio Garrido, contesta á oposición trala rolda de prensa de onte, martes 17 de novembro, defendendo que a apertura do matadoiro "debe ir acompañada dun cambio no modelo de xestión para evitar que siga xerando perdas económicas". Garrido sostén que non se trata de pechar o servizo, senón de garantir a súa continuidade cunha fórmula que non obrigue os veciños a asumir o déficit.

Segundo explica o executivo local, o matadoiro permanece parado pola avaría do sistema que atorda os porcos antes do sacrificio. Trátase dunha máquina instalada en 2004 que non ten reparación e que debe ser substituída, xa que sen ela a normativa non permite realizar sacrificios. A adquisición dun novo equipo custaría uns 250.000 euros, aos que habería que engadir as obras necesarias para a súa instalación.

Porén, Camiña Sarria pon o foco no custo anual do servizo. Segundo os seus datos, o Concello cobra un euro por cada tres que custa realizar o sacrificio dun animal, polo que os dous euros restantes son asumidos con fondos públicos. Isto supón unhas perdas anuais duns 200.000 euros, equivalentes a aproximadamente 15 euros por habitante, utilice ou non as instalacións.

"É como un bar que vende cada café a un euro cando preparalo lle custa tres. Podes comprarlle unha cafeteira nova, pero cada café que sirva seguirá perdendo dous euros. E cantos máis cafés sirva, máis perde. Iso non é salvar o matadoiro: é seguir pagando a diferenza co diñeiro de todos", exemplificou o alcalde en referencia á proposta da oposición de investir 250.000 euros para recuperar o servizo nas mesmas condicións.

A alternativa que defende o goberno municipal é unha xestión indirecta, mantendo a titularidade pública do edificio. Así, unha empresa, os propios carniceiros ou a Xunta poderían asumir o funcionamento das instalacións. O Concello asegura que xa ofreceu por escrito a posibilidade de establecer un convenio de xestión ou un alugueiro a custo cero, con apoio municipal para parte dos gastos de electricidade ou mantemento. A cambio, manteríanse os prezos fixados polo Concello.

"O papel do Concello é garantir que Sarria teña matadoiro e prezos xustos. Facelo funcionar cada día é traballo dos profesionais do sector. Así, o carniceiro paga o mesmo, o gandeiro ten matadoiro e o veciño deixa de pagar a perda", defendeu Garrido.

Camiña Sarria lembra tamén que o servizo recibe 50.000 euros anuais da Deputación e conta cun convenio de 30.000 euros coa Xunta, o que suma 80.000 euros en axudas. A formación considera que estas achegas deben poñerse en relación coa inversión necesaria para renovar a maquinaria e coas perdas anuais que xera a actividade.

Outro dos argumentos do executivo é o carácter comarcal do matadoiro. Garrido considera que, se presta servizo a toda a comarca, o seu financiamento non debería recaer exclusivamente nos veciños de Sarria. "Se é un servizo comarcal, que o asuman as administracións que teñen competencia sobre a comarca: a Deputación e a Xunta. Nós xa o propuxemos en 2024 e ninguén o recolleu", afirmou.

O alcalde tamén reivindicou os investimentos realizados durante o seu mandato e asegurou que entre 2019 e 2023 o Concello destinou 45.300 euros á caldeira do matadoiro, fronte aos 11.400 euros investidos nos oito anos anteriores.

"Queremos un matadoiro para os próximos vinte anos, non un burato para os próximos vinte anos", concluíu Garrido.

0.14331793785095