Nace a Unión Deportiva Galaicas O Páramo para facer do deporte un punto de encontro no rural
O Páramo conta cunha nova entidade deportiva. A Unión Deportiva Galaicas O Páramo acaba de iniciar a súa andaina cun proxecto que pretende ir máis alá da práctica de exercicio e utilizar o deporte como ferramenta para reunir á veciñanza, favorecer as relacións entre xeracións e contribuír a dar vida ao rural.
A iniciativa xorde da vontade de poñer en marcha unha proposta diferente no propio territorio. Os seus impulsores defenden que non é necesario marchar fóra para atopar alternativas deportivas e de lecer e apostan por crear no municipio un espazo no que compartir actividades, coñecer outras persoas e establecer novos vínculos.
A filosofía coa que nace Galaicas parte dunha concepción ampla do deporte. O obxectivo non se limita á competición, senón que busca convertelo nunha oportunidade para "coñecernos, xuntarnos, compartir, crear amizades e facer plans", ao tempo que se contribúe a que as aldeas conten con máis actividade.
Un dos principios do novo club será precisamente o seu carácter aberto. A entidade quere chegar tanto a homes como a mulleres e incorporar nenos e nenas, mocidade, persoas adultas e maiores. A proposta estará dirixida tanto a quen practica deporte habitualmente como a aquelas persoas que nunca se animaron a facelo.
Do mesmo xeito, Galaicas quere dar cabida a diferentes formas de entender a actividade deportiva. Haberá espazo para quen busque competir, pero tamén para aqueles participantes que simplemente queiran facer exercicio, relacionarse con outras persoas e pasar un bo momento.
A nova entidade pretende así que cada actividade sirva para xerar novas oportunidades de encontro. A intención é crear un club no que poidan xurdir ideas e amizades e no que distintas xeracións compartan experiencias, reforzando deste xeito a vida comunitaria.
A Unión Deportiva Galaicas O Páramo inicia esta nova etapa coa mirada posta no territorio e nas persoas que viven nel, reivindicando o potencial do deporte como elemento de unión e como unha vía máis para dinamizar o rural.